Police Taekwondo Club yegukanye igikombe cy’irushanwa ryateguwe hagamijwe kwibuka ku nshuro ya 30 Jenoside yakorewe Abatutsi mu Rwanda mu 1994. Ni irushanwa ryabereye mu Karere ka Kirehe ho mu Ntara y’Iburasirazuba, rikaba ryari ryitabiriwe n’abakinnyi basaga 200 baturutse mu makipe n’amashuri ya Taekwondo atandukanye mu Rwanda. Police TC ni yo yahize andi makipe mu kwegukana imidali myinshi, ikurikirwa na Kirehe Family Taekwondo Club, mu gihe Dream Fighters Taekwondo Club yari isanganywe iki gikombe yo yaje ku mwanya wa gatatu. Mu bakinnyi ku giti cyabo, Masabo Olivier wa Police Taekwondo Club na Tuyisenge Kevine wa Dream Fighters TC ni bo bahize abandi. Iryo rushanwa ryatangiye kuwa gatandatu tariki ya 1/6/2024 risozwa ku cyumweru tariki ya 2/6/2024, rikaba ryarabimburiwe n’urugendo rwo kwibuka ndetse no gusura Urwibutso rwa Jenoside yakorewe Abatutsi muri Mata 1994 rwa Nyakarambi mu Karere ka Kirehe. Urwo rugendo rwakurikiwe no gusura urwibutso rwa Nyakarambi ndetse n’irushanwa rya Taekwondo bikaba byarakozwe mu rwego rwo kwibuka, kuzirikana no kunamira inzirakarengane zazize Jenoside yakorewe Abatutsi mu Rwanda mu 1994. Mu gutangiza ibi bikorwa RTF yari ihagarariwe n’Umunyamabanga Mukuru, Bwana Boniface MBONIGABA wari kumwe n’Umuyobozi w'Akarere ka Kirehe wungirije Ushinzwe Imibereho myiza, Madamu Mukandayisenga Janviere. Ibyo bikorwa kandi byasojwe ku mugaragaro n’Umuyobozi w’Akarere ka Kirehe, Bwana Bruno RANGIRA.